කසාන් අන්තර්ජාතික මුස්ලිම් චිත්රපට උළෙලේදී හොඳම නළුවාට හිමි සම්මානය හා ලන්ඩන් රේන්බෝ සිනමා උළෙලේදී හොදම අධ්යක්ෂණය වෙනුවෙන් හිමි සම්මානය ඇතුළු ජාත්යන්තර සම්මාන රැසක් හිමිකරගත් “ද නිවුස් පේපර්” සිනමාපටය ප්රථම වරට දේශීය වශයෙන් ඇගයීම පසුගිය සැප්තැම්බර් 30 වනදා කොළඹ දිස්ත්රික් ලේකම් කාර්යාලයීය ශ්රවණාගාරයේදී සිදුවිය.
කොළඹ දිස්ත්රික් ලේකම්/දිසාපති ප්රදීප් යසරත්න මහතාගේ මගපෙන්වීම යටතේ කොළඹ දිස්ත්රික් ලේකම් කාර්යාලයේ හා කොළඹ දිස්ත්රික් සංස්කෘතික බලමණ්ඩලයේ සංවිධාන ශක්තියෙන් පැවැත්වුණු සම්මාන පිදීමේ උත්සවය “කොළොම්තොට හරසර ප්රණාම” උළෙල ලෙස සංස්කෘතික අංගවලින් විචිත්රවත්ව පැවැත්වුණි.
මෙම උළලේදී “ද නිවුස් පේපර්” චිත්රපටයේ අධ්යක්ෂකවරුන් මෙන්ම ප්රධාන චරිත සඳහා රංගනයෙන් දායක වූ කුමාර තිරිමාදුර මහතා සහ සරත් කොතලාවල මහතා ඇගයීමට ලක්විය.
එමෙන්ම එම චිත්රපටයේ සම නිෂ්පාදකවරුන් වන ජනමාධ්ය හා ප්රවාහන අමාත්ය ආචාර්ය බන්දුල ගුණවර්ධන මහතා, සරසවි පොත් ප්රකාශක ආයතනයේ අධිපති එච් ඩී ප්රේමසිරි සහ ප්රවීන සංස්කරණ ශිල්පී රවින්ද්ර ගුරුගේ යන මහත්වරුන්ද විශේෂ සම්මානයට පාත්ර විය.
මීට අමතරව එම සිනමාපටයේ රංගනයෙන් දායක වූ සියලුම රංගන ශිල්පීන්ට මෙන්ම අනෙකුත් සහය දැක්වූ ශිල්පීන්ටද සහතික පත්ර පිරිනැමීය. මෙම සම්මාන උළෙලේ ප්රධාන ආරාධිතයා වශයෙන් එක්වූ ජනමාධ්ය හා ප්රවාහන අමාත්ය ආචාර්ය බන්දුල ගුණවර්ධන මහතා අදහස් දක්වමින් පැවසුවේ ජාත්යන්තර සම්මාන දිනාගත් මෙම සිනමා නිර්මාණය සඳහා නිෂ්පාදනයෙන් දායක වීමට ලැබීම සතුටට කරුණක් බවය.
“ද නිවුස් පේපර්” සිනමාපටය ජාත්යන්තර වශයෙන් ඇගයීම් ලැබුවත් වසර 3කට පසුව හෝ දේශීය වශයෙන් ලද, ප්රථම ඇගයීම වන “කොළොම්තොට හරසර ප්රණාම” සම්මානය තමන්ට ඉතා වැදගත් බව සරත් කොතලාවල මහතා සම්මාන ලබාගැනීමෙන් අනතුරුව උත්සව සභාව අමතමින් පැවසිය.
මෙරට ක්රීඩාවට හිමි ස්ථානය සිනාමාවටත් හිමිවන්නේ නම් මෙවැනි ජාත්යන්තර වශයෙන් ඇගයීමට ලක්වන නිර්මාණ නිරන්තරයෙන් බිහිවන බව පැවසු කුමාර තිරිමාදුර මහතා, “කොළොම්තොට හරසර ප්රණාම” සම්මාන උළෙල සංවිධානය කිරීම පිළිබඳව සංවිධායක මණ්ඩලයට තම ස්තුතිය පළකළේය.
-කොළඹ දිස්ත්රික් මාධ්ය ඒකකය -